ചന്ദ്രേട്ടന്‍ നിര്‍മ്മിച്ച സ്വപ്ന വീട് ഇനി പാറുഅമ്മയ്ക്ക് സ്വന്തം


ഭീമനടി: വെസ്റ്റ് എളേരി മൗക്കോട്ടെ വ്യാപാരിയും കെ.വി.സി ഗ്രൂപ്പ് എം.ഡിയുമായ കുത്തൂര്‍ വീട്ടില്‍ ചന്ദ്രേട്ടന്‍ നിര്‍മ്മിച്ച സ്വപ്ന വീട് ഇനി നിര്‍ദ്ധന മാതാവ് തൂക്ക പ്ലാവ് വീട്ടില്‍ പാറു അമ്മയ്ക്ക് സ്വന്തം.
ലോക് ഡൗണ്‍ പ്രതിസന്ധിക്കിടയിലും നിര്‍മ്മാണം പൂര്‍ത്തീകരിച്ച ആരും കൊതിക്കുന്ന സ്വപ്ന വീടിന്റെ താക്കോല്‍ എം.രാജഗോപാല്‍ എം.എല്‍.എ ചിറ്റാരിക്കല്‍ എസ്.ഐ പി.കെ.വിനോദ്കുമാര്‍ ചന്ദ്രേട്ടന്‍ എന്നിവര്‍ പങ്കെടുത്ത ലളിതമായ ചടങ്ങില്‍ പാറു അമ്മയ്ക്ക് കൈമാറി.
സ്വന്തമായി നല്ലൊരു വീടില്ല എന്ന പാറുഅമ്മയുടെ സ്വകാര്യ ദുഃഖം തിരിച്ചറിഞ്ഞ ചന്ദ്രേട്ടന്‍ ബിസിനസ് ടൂറിനിടെ തായ്‌ലാന്റില്‍ വെച്ചാണ് തന്റെ വ്യാപാര സ്ഥാപനത്തില്‍ സ്ഥിരമായി എത്തുന്ന പാറു അമ്മയ്ക്ക് വീട്‌വെച്ചു നല്‍കുന്നതിനെ കുറിച്ച് ആലോചിച്ചത്.
യാത്രക്കിടെ തന്റെ സുഹൃത്തുക്കളോട് ഈ ആശയം പങ്കുവെക്കുകയും വീട്ടിലെത്തി ഭാര്യയോടും മക്കളോടും തന്റെ ആഗ്രഹം പറയുകയും ചെയ്തു.
ഭാര്യ സാവിത്രി അമ്മയും മൂന്ന് മക്കളും അച്ഛന്റെ ആ വലിയ മനസിന്റെ ആഗ്രഹം എത്രയും വേഗത്തില്‍ നിറവേറ്റാന്‍ കൂട്ടു നില്‍ക്കുകയുമായിരുന്നു. അങ്ങനെയാണ് കട തുടങ്ങി നാല്‍പ്പത്‌വര്‍ഷം പൂര്‍ത്തിയായ വ്യാഴാഴ്ച തന്നെ ചന്ദ്രേട്ടന്റെ സ്വപ്ന വീട് പാറുഅമ്മയ്ക്ക് ലഭിച്ചത്.
മൂന്ന് മുറികളും ഒരുഹാളും അടുക്കളയും ബാത്ത് റൂമും അടങ്ങുന്ന വീടിന്റെ നിലം പൂര്‍ണ്ണമായും ടൈല്‍ സ് പതിപ്പിച്ചതാണ്.
1980 മെയ് 28 നാണ് കുത്തൂര്‍ വീട്ടില്‍ ചന്ദ്രന്‍ എന്ന ഇപ്പോഴത്തെ കെ.വി.സി ചന്ദ്രന്‍ മൗക്കോട് പലചരക്ക് കട ആരംഭിച്ചത്. കാലത്തിന്റെ മാറ്റങ്ങള്‍ക്കൊപ്പം ചന്ദ്രേട്ടന്റെ ഈ കട സൂപ്പര്‍ മാര്‍ക്കറ്റ്. സിമന്റ്. കമ്പി എന്ന് വേണ്ട ഒരുനാടിനാവശ്യമായ എല്ലാ സാധനങ്ങളുംലഭിക്കുന്ന ഇടമായി വളര്‍ന്നു.
കച്ചവടത്തില്‍ നിന്നും ലാഭത്തിന്റെ ഒരു വിഹിതംമാറ്റിവെച്ചാണ് കട തുടങ്ങിയതിന്റെ നാല്‍പ്പതാം വര്‍ഷം നാട്ടിലെ സാമൂഹ്യ സാംസ്‌കാരിക രാഷ്ട്രീയ പാര്‍ട്ടി പ്രവര്‍ത്തകര്‍ തെരഞ്ഞെടുത്ത 65 കഴിഞ്ഞ പാറു അമ്മയ്ക്ക് ആരും കൊതിക്കുന്ന സുന്ദര വീട് കൈമാറാന്‍ ചന്ദ്രേട്ടന് കഴിഞ്ഞത്.
ഫെബ്രുവരി മാസം 20 നാണ് പാറുഅമ്മയ്ക്ക് നല്‍കുന്ന വീടിന്റെ നിര്‍മ്മാണം ആരംഭിച്ചത് എന്ന് ചന്ദ്രേട്ടന്‍ പറയുന്നു. എന്നാല്‍ ലോക്ഡൗണ്‍ കാരണം നിര്‍മ്മാണ സാധനങ്ങള്‍ എത്തിക്കുവാന്‍ പ്രയാസം നേരിട്ടു. മെയ് മാസം 28ന് തന്നെ വീടിന്റ താക്കോല്‍ പാറു അമ്മയെ ഏല്‍പ്പിക്കണം എന്ന മോഹം ചന്ദ്രേട്ടനെക്കാള്‍ കൂടുതല്‍ ഇവരുടെ ഭാര്യ സാവിത്രി അമ്മയ്ക്കും മക്കള്‍ക്കും മരുമക്കള്‍ക്കുമായിരുന്നു.
ലോക് ഡൗണ്‍ തടസം നീക്കാന്‍ ചന്ദ്രേട്ടന്‍ എന്ന വലിയ മനസിന്റെ ഉടമയെ സഹായിച്ചത് ചിറ്റാരിക്കാല്‍ എസ്.ഐ കെ.പി.വിനോദ് കുമാര്‍ ആയിരുന്നു. ഇന്നലെ ഉച്ചയ്ക്ക് രണ്ടരയോടെ ചന്ദ്രേട്ടനും എം. രാജഗോപാല്‍ എം.എല്‍. എ യും ചിറ്റാരിക്കാല്‍ എസ്.ഐ. വിനോദ് കുമാറും ചേര്‍ന്ന് വീടിന്റെ താക്കോല്‍ കൈമാറിയപ്പോള്‍ നഷ്ട്ട സ്വപ്നങ്ങളെ കുറിച്ച് ഓര്‍ക്കാതെ പുതിയ വീട്ടില്‍ ഇനിയുള്ള കാലം കഴിയാം എന്നോര്‍ത്ത് പാറു അമ്മ ആനന്ദ കണ്ണീര്‍ പൊഴിച്ചു.
മാധ്യമ പ്രവര്‍ത്തകര്‍ ഉള്‍പ്പെടെ ചുരുക്കം ചില വ്യക്തികള്‍ ഈ വികാര നിര്‍ഭര ചടങ്ങില്‍ പങ്കെടുത്തപ്പോള്‍ ചന്ദ്രേട്ടന്റെ ഭാര്യ സാവിത്രി അമ്മയും. മക്കളും. മരുമക്കളും അഥിതി കളായി എത്തിയ വര്‍ക്ക് പാലുകാച്ചിയ വീട്ടില്‍ തയ്യാറാക്കിയ ചായസല്‍ക്കാരവും നടത്തി. ആരോരുമില്ലെന്ന പാറു അമ്മയുടെ ചിന്തകള്‍ക്ക് ഇതോടെ അറുതിയായി.
പാറുഅമ്മയുടെ പുതിയ വീട്ടിലേക്ക് യാത്രാ സൗകര്യത്തിനായി ചന്ദ്രേട്ടന്‍ റോഡും നിര്‍മ്മിച്ചുനല്‍കി. ഇതിനായി പത്തു സെന്റ് സ്ഥലമാണ് ചന്ദ്രേട്ടന്‍ വിട്ടു നല്‍കിയത്.
വീടു നിര്‍മ്മാണത്തിനും മറ്റുമായി ഏഴ് ലക്ഷത്തോളം രൂപ ചിലവ് വന്നതായി ചന്ദ്രേട്ടന്‍ പറഞ്ഞു. ഭര്‍ത്താവ് നേരത്തെ ഉപേക്ഷിച്ച പാറു അമ്മയ്ക്ക് മൂന്ന് പെണ്‍മക്കളാണ്.

Post a Comment

0 Comments