ശ്രീചിത്രയില്‍ കടുത്ത പ്രതിസന്ധി; 30 ഡോക്ടര്‍മാര്‍ കൊവിഡ് നിരീക്ഷണത്തില്‍


തിരുവനന്തപുരം: കൊവിഡ് മുന്‍കരുതലിന്റെ ഭാഗമായി കനത്ത ജാഗ്രതയില്‍ ശ്രീചിത്ര ആശുപത്രി.
വിദേശത്ത് പഠനം കഴിഞ്ഞെത്തിയ ഡോക്ടര്‍ക്ക് കൊവിഡ് സ്ഥിരീകരിച്ചതോടെയാണ് ജാഗ്രത പുലര്‍ത്താന്‍ ആരോഗ്യ വകുപ്പ് മുന്നറിയിപ്പ് നല്‍കിയത്. കൂടുതല്‍ ഡോക്ടര്‍മാരെ കൊവിഡ് 19 നിരീക്ഷണത്തിലാക്കിയിട്ടുണ്ട്. ആറ് വിഭാഗങ്ങളിലെ ഡോക്ടര്‍മാര്‍ വീടുകളില്‍ ആണ് നിരീക്ഷണത്തില്‍ കഴിയുന്നത്. മുപ്പത് ഡോക്ടര്‍മാരാണ് നിരീക്ഷണത്തിലുള്ളത്. അടിയന്തരമല്ലാത്ത എല്ലാ ശസ്ത്രക്രിയകളും മാറ്റിവെച്ചു.
രാജ്യത്തിന്റെ വിവിധഭാഗങ്ങളില്‍ നിന്ന് പലതരത്തിലുള്ള ആളുകള്‍ ചികിത്സതേടിയെത്തുന്ന ആശുപത്രിയാണ് രാജ്യത്തെതന്നെ പ്രമുഖ ആശുപത്രികളിലൊന്നായ ശ്രീചിത്ര.
ആരോഗ്യ വകുപ്പ് അധികൃതര്‍ ആശുപത്രിയില്‍ കൂടിയാലോചനകള്‍ നടത്തുന്നുണ്ട്. സുരക്ഷാ മുന്‍കരുതലുകള്‍ കൈക്കൊള്ളുന്നതിന്റെ ഭാഗമായാണ് യോഗം ചേര്‍ന്നത്. മാര്‍ച്ച് ഒന്നിന് സ്‌പെയിനില്‍ നിന്ന് ഉപരിപഠനം കഴിഞ്ഞ് തിരിച്ചെത്തിയ ഡോക്ടര്‍ക്കാണ് കൊവിഡ് സ്ഥിരീകരിച്ചത് . ഡോക്ടറുമായി സമ്പര്‍ക്കം പുലര്‍ത്തിയവര്‍ എല്ലാം നിരീക്ഷണത്തിലാണ്.
ഡോക്ടര്‍ ജോലി ചെയ്ത പശ്ചാത്തലത്തില്‍ റേഡിയോളജി ലാബ് അടച്ചുപൂട്ടി. ഡോക്ടറോടൊപ്പം ജോലിചെയ്ത നഴ്‌സുമാരടക്കമുള്ള ആശുപത്രി ജീവനക്കാരും കടുത്ത ആശങ്കയിലാണ്. ഒ.പിയില്‍ രണ്ടുദിവസം ജോലിചെയ്തനിലക്ക് നിരവധിപേരിലേക്ക് രോഗം പകര്‍ന്നിട്ടുണ്ടെന്നാണ് കരുതുന്നത്.
പ്രധാന വകുപ്പുകളിലെ തലവന്‍മാരടക്കം ഡോക്ടര്‍മാര്‍ നിരീക്ഷണത്തിലായതോടെ ആശുപത്രിയുടെ പ്രവര്‍ത്തനങ്ങളെയും ബാധിക്കുമെന്ന് ആശങ്ക ഉയര്‍ന്നിട്ടുണ്ട് .ഇതെല്ലാം മറികടക്കുന്നതിന് ഉള്ള നിര്‍ദ്ദേശങ്ങളും ആരോഗ്യവകുപ്പ് അധികൃതരുടെ അടിയന്തര യോഗത്തില്‍ ചര്‍ച്ചയാകും.
കൊവിഡ് മുന്‍കരുതല്‍ പട്ടികയില്‍ സ്‌പെയിന്‍ ഇല്ലാത്തതിനാല്‍ വിദേശത്തു നിന്ന് എത്തിയ ഡോക്ടര്‍ ആദ്യഘട്ടത്തില്‍ മുന്‍കരുതലൊന്നും എടുത്തിരുന്നില്ല. മാത്രമല്ല പത്ത് പതിനൊന്ന് തീയതികളില്‍ മാസ്‌ക് ധരിച്ച് ഡോക്ടര്‍ ഒപിയിലെത്തിയ രോഗികളെ പരിശോധിക്കുകയും ചെയ്തിരുന്നു.
അതുകൊണ്ടുതന്നെ സാഹചര്യം വലിയ ഗൗരവമുള്ളത് തന്നെയെന്നാണ് ആരോഗ്യ വകുപ്പ് വിലയിരുത്തുന്നത്. വിശദമായ സമ്പര്‍ക്ക പട്ടിക തയ്യാറാക്കാനാണ് തീരുമാനം.
ഒരു പ്രധാന ആശുപത്രിയുടെ അവസ്ഥ ഇതായിരിക്കെ തിരുവനന്തപുരം ജില്ലയില്‍ മാത്രം 1449 പേരാണ് നിലവില്‍ നിരീക്ഷണത്തിലുള്ളത്. ഇറ്റാലിയന്‍ പൗരന്‍ സഞ്ചരിച്ച വര്‍ക്കലയിലും പ്രത്യേക യോഗം ജില്ലാ കളക്ടറുടെ നേതൃത്വത്തില്‍ നടക്കുന്നുണ്ട്. ഒന്നും രണ്ടും ഘട്ടങ്ങളിലായി സമ്പര്‍ക്ക പട്ടികയും റൂട്ട് മാപ്പും വിശദമായി തയ്യാറാക്കുമെന്നാണ് ജില്ലാ ഭരണകൂടം പറയുന്നത്.
ഇതിനിടയില്‍ കേന്ദ്ര വിദേശകാര്യ സഹമന്ത്രി വി.മുരളീധരന്‍ ശ്രീചിത്ര ആശുപത്രി അധികൃതരില്‍ നിന്നും വിശദീകരണം തേടിയിട്ടുണ്ട്.

Post a Comment

0 Comments